Palabra de vida - Xaneiro 2012

Como en anos pasados, do 18 ao 25 de xaneiro celébrase en moitos lugares do mundo a «Semana de oración pola unidade dos cristiáns», que noutros sitios ten lugar en Pentecoste.
O lema para a «Semana de oración» de 2012, tomado da carta de san Paulo aos corintios, é: «Todos seremos transformados pola vitoria do noso Señor Xesucristo» (cf. 1 Co 15, 51-58).
Propoñemos como Palabra de vida deste mes un texto de Chiara que comenta Colosenses 3, 1, que, ao noso parecer, garda relación co lema elixido.

«Resucitastes con Cristo! Buscade as cousas de alá enriba, onde Cristo está sentado á dereita de Deus» (Col 3, 1)¹.

Estas palabras que san Paulo dirixe á comunidade dos colosenses dinnos que existe un mundo no que reina o amor verdadeiro, a comuñón plena, a xustiza, a paz, a santidade, a alegría; un mundo onde o pecado e a corrupción xa non poden entrar; un mundo onde a vontade do Pai se cumpre perfectamente.

É o mundo ao que pertence Xesús. É o mundo que El, pasando a través da dura proba da paixón, nos abriu de par en par coa súa resurrección.

«Resucitastes con Cristo! Buscade as cousas de alá enriba, onde Cristo está sentado á dereita de Deus»

Nós non é que esteamos chamados a este mundo de Cristo –di san Paulo–, senón que xa pertencemos a el. A fe dinos que mediante o bautismo nos incorporamos a Cristo e, por conseguinte, participamos na súa vida, nos seus dons, na súa herdanza, na súa vitoria sobre o pecado a sobre as forzas do mal, pois temos resucitado con El.

Pero, a diferenza das almas santas que xa alcanzaron a meta, a nosa pertenza a este mundo de Cristo non é plena nin está completamente desvelada; sobre todo, non é estable nin definitiva.

Mentres esteamos nesta terra estamos expostos a mil perigos, dificultades, a tentacións que poden facernos vacilar, poden frearnos no camiño e incluso desviarnos cara a falsas metas.

«Resucitastes con Cristo! Buscade as cousas de alá enriba, onde Cristo está sentado á dereita de Deus»

Compréndese, pois, a exhortación do apóstolo: «Buscade as cousas de alá enriba». Tratade de saír deste mundo non xa materialmente, senón espiritualmente; abandonade as regras e as paixóns do mundo para deixarvos guiar en todas as situacións polos pensamentos e sentimentos de Xesús.

Pois «as cousas de alá enriba» remítennos ás leis do ceo, a lei do Reino dos Ceos, que Xesús trouxo á terra e quere que apliquemos xa desde agora.

«Resucitastes con Cristo! Buscade as cousas de alá enriba, onde Cristo está sentado á dereita de Deus»

Como vivir, pois, esta Palabra de vida? Esta estimúlanos a non contentarnos cunha vida mediocre, a base de medias tintas e de componendas, senón a adecuala, coa graza de Deus, e a lei de Cristo.

Impúlsanos a vivir e a comprometernos no noso contorno a dar testemuño dos valores que Xesús trouxo á terra, como poden ser o espírito de concordia e de paz, de servizo aos irmáns, de comprensión e perdón, honestidade, xustiza, integridade no noso traballo, fidelidade, pureza, respecto á vida, etc.

Como vemos, trátase dun proxecto tan amplo como a vida. Pero, para non quedarnos en vaguidades, poñamos en práctica este mes esa lei de Xesús que en certo modo resume todas as demais: poñámonos ao servizo de cada irmán vendo nel a Cristo.

Por outra parte, non é isto o que se nos pedirá ao final de nosa existencia?

Chiara Lubich

¹⁾ Escrita en 1988: Palabra de vida, abril 1988, publicada en Ciudad Nueva nº 238.