Kristauen batasunaren aldeko Otoitz-AsteanKristauak[1] gure arreta gai jakin batean jartzera gonbidatuta gaude, Paulok Efesoarrei idatzitako Gutunean. Espetxeko eskutitzak deiturikoetan, Paulok hartzaileei beren fedearen lekukotza sinesgarria emateko aholkatzen die batasunaren bidez, fede, izpiritu eta itxaropen bakar batean oinarritua, horren bidez Kristoren lekukotza gorputz gisa ematen delarik.
«Bat bakarra da gorputza eta bat bakarra Izpiritua, egin zaizuen deiari dagokion itxaropena ere bat bakarra den bezala».
Paulok esperantzara deitzen gaitu. Zer da itxaropena eta zergatik gonbidatzen gaitu hura bizitzera? Guztion onerako zaindu, landu eta fruitua emanarazi behar dugun kimua, oparia eta zeregina da. «Kristau itxaropenak gailur-lerroko bide meharrean kokatzea eskatzen digu, gure bokazioak egunero eta une oro eskatzen digun muga horretan, Jainkoaren gureganako zintzotasunari leial izatea aukeratzeko»[2].
Kristauontzat, gure bokazioa, gure deia ez da gizabanakoaren eta Jainkoaren arteko kontua bakarrik, baizik eta deialdia da, hau da, elkarrekin deituak gara; Ebanjelioa bizitzeko konpromisoa hartzen dutenen arteko batasunerako deia da. Chiara Lubichen hitzaldi eta idazkietan sarritan aurkitzen ditugu batasunari buruzko aipamen esplizituak, bere espiritualtasunaren ezaugarri gisa: hau Jesus gure artean egotearen fruitua da. Eta presentzia hori zoriontasun sakonaren iturri da.
«Kristauarentzat batasuna hain garrantzitsua baldin bada, orduan ez dago ezer bere bokazioaren aurka hainbeste egiten duenik hura urratzea baino. Eta batasunaren aurka bekatu egiten dugu beti, indibidualismoaren tentazioari– etengabe agertzen den horri – men egiten diogun bakoitzean; eta horrek gauzak geure kabuz egitera bultzatzen gaitu, gure irizpenak, gure interesak edo ospe pertsonalak gidatuta, besteak, haien eskakizunak eta eskubideak alde batera utziz edo mespretxatuz»[3].
«Bat bakarra da gorputza eta bat bakarra Izpiritua, egin zaizuen deiari dagokion itxaropena ere bat bakarra den bezala».
Guatemalan, kristau eliza ezberdinetako kideen artean elkarrizketa oso bizia dago. Ramirok idatzi digu: «Kristauen batasunaren aldeko Otoitz-Astea prestatu genuen eliza desberdinetako pertsona-talde batekin batera. Egitarauan gazteekin prestatutako arte jaialdi bat eta eliza ezberdinetan hainbat ekitaldi sartu ziren. Gotzain Katolikoen Biltzarrak esperientziarekin jarraitzeko eskatu zigun, Amerika osotik etorritako gotzain katoliko eta eliza ezberdinetako talde batekin truke une bat prestatuz ere, Nizeako Kontzilioaren 1700. Urteurrenari eskainitako topaketa baterako. Jarduera horietatik haratago, oso indartsu bizi dugu gure arteko batasuna eta horrek dakartzan fruituak: anaitasuna, poza eta bakea».
Patrizia Mazzola eta Bizi-Hitzako taldea
[1] Ipar hemisferioan urtarrilaren 18tik 25era ospatzen da, eta Hego hemisferioan, Mendekoste astean. Aurtengo otoitzeko testuak
Armeniako Eliza Apostolikoak koordinatutako talde ekumeniko batek prestatu ditu
[2] Madeleine Delbrêl, askoren ustez XX. mendeko pertsonalitate espiritualik esanguratsuenetakoa: https://www.pasomv.it/files/bocc/madalein_del_brel_noi_spes.pdf.
[3] C. LUBICH, 1985eko uztaileko Bizi-Hitza: EAD., Palabras de Vida/1 (1943-1990),Madril 2020, 343. or.
