1949ko uztailaren 16an Chiara Lubichek eta Igino Giordanik, Fokolareen Mugimenduaren sortzaileetako batek, egindako Batasun Itunaren urteurrena ospatzen dugu hilabete honetan. Ospakizunaren harira, Margaret Karramek mezu bat zuzendu die munduan Fokolareen Mugimenduko kide diren guztiei.
Adiskide maiteok:
Aurten ere, uztailaren 16a —Chiara eta Igino Giordaniren (Foco) arteko Batasun Itunaren urteurrena— gizateria gero eta indarkeria eta desilusio handiagoak mehatxatzen duen une batean gertatzen da. Bakea laster etortzeko luzaroan eta gogor otoitz egin dugu, baina herrialde askotan oraindik ere sufrimendu handia dago gatazka etengabeengatik.
Hala ere, nire ariman sentitzen dut Mugimenduarentzat hain esanguratsua den egun honek itxaropen berria sor diezagukeela. 1949ko Itun hartan, Paradisuko esperientzia mistikoa ireki zitzaion Chiarari, eta bertan Jainkoak Obra jaioberriak batasunaren espiritualitatearen bidez gizateriari eskain ziezaiokeen ekarpena ere erakutsi zion.
Horregatik sentitzen dut bihotzean bakoitzak erantzukizun handia duela: Itun bikain hau eguneroko bizitzan gorpuztea, "argi-bideak jendetzaren gainean marrazteko eta, aldi berean, hurkoarekin zauria, gosea, kolpeak, poz laburrak partekatzeko".[1].
Hurbiltasunaren gaia aztertzen eta Itxaropenaren Jubileua bizitzen ari garen urtean, baliatu dezagun aukera hau gure anai-arreba bakoitzari gure bihotzeko ateak zabaltzeko, batasuna sustatzeko eta gure komunitateak berpizteko.
Horrela, gizabanako gisa ditugun harremanak, baina baita talde gisa ditugunak ere, gero eta gehiago izango dira Paulo apostoluak erromatarrei egindako gonbidapen horren isla: «Maita ezazue elkar bihotzez senide on bezala, elkar nork baino nork maiteago izaten saiatuz.» (ikusi Erm. 12,10).
Eta horrelaxe, hain zuzen ere, izango da Itunaren oinarrian dagoen "maitasunezko huts" hori beteko dugunean. Ziur nago honek bakearen fruituak emango dituela gugan, Obran eta munduan.
Fokolareen Mugimenduaren Batzar Nagusirako prestaketa onena izango da, datorren 2026ko martxoan, eta etorkizun hurbilean jarraitu beharreko bideak bereizten lagunduko diguna.
Onena opa dizuet guztioi eta, Itun-egun zoriontsua!
Margaret Karram-ek
[1] Chiara Lubich: El atractivo de nuestro tiempo.Liburua: La doctrina espiritual.Madril: Ciudad Nueva, 2002
